نیروبی( مانیٹرنگ ڈیسک) کینیا میں تفریحی فضائی سفر کے دوران سیاحوں کا ہیلی کاپٹر گر کر تباہ ہوگیا، حادثے میں 5 امریکی شہریوں سمیت 7 افراد جان سے ہاتھ دھو بیٹھے۔حکام کے مطابق ہلاک ہونے والوں میں ایکواڈور کی انٹیلی جنس کے سربراہ اور ان کی اہلیہ بھی شامل ہیں۔کینیا سول ایوی ایشن اتھارٹی کے مطابق ہیلی کاپٹر لوئیسابا کے محفوظ جنگلی حیات کے علاقے سے ایواسو نیرو کی جانب پرواز کر رہا تھا کہ حادثے کا شکار ہوگیا۔ حادثے کی فوری طور پر وجوہات معلوم نہیں ہوسکیں۔امریکی محکمہ خارجہ نے 5 امریکی شہریوں کی ہلاکت کی تصدیق کی ہے، جبکہ امریکی سفارتخانہ مقامی حکام کے ساتھ رابطے میں ہے اور متاثرین کے حوالے سے قونصلر معاونت فراہم کر رہا ہے۔
