اسلام آباد( کامرس ڈیسک) پاکستان کا تجارتی خسارہ تاریخ کی بلند ترین سطح پر پہنچ گیا ہے۔ادارہ شماریات کے مطابق رواں مالی سال کے پہلے 11 ماہ میں تجارتی خسارہ 34 ارب 75 کروڑ ڈالر ریکارڈ کیا گیا۔ اسی عرصے میں برآمدات 27 ارب 90 کروڑ ڈالر سے زائد رہیں جبکہ درآمدات 62 ارب 66 کروڑ ڈالر سے تجاوز کر گئیں۔اعداد و شمار کے مطابق گزشتہ 11 ماہ کے دوران برآمدات میں 5.61 فیصد کمی ہوئی جبکہ درآمدات میں 5.94 فیصد اضافہ دیکھا گیا۔ گزشتہ مالی سال کے اسی عرصے میں درآمدات 59 ارب 14 کروڑ ڈالر سے زائد تھیں۔رپورٹ میں بتایا گیا ہے کہ مئی کے مہینے میں اپریل کے مقابلے میں برآمدات میں 9.59 فیصد اضافہ ہوا، جبکہ اسی مدت میں درآمدات میں 21.55 فیصد کمی ریکارڈ کی گئی۔اسی طرح مئی کے دوران گزشتہ سال کے مئی کے مقابلے میں برآمدات میں معمولی اضافہ جبکہ درآمدات میں کمی دیکھی گئی۔ مجموعی طور پر درآمدات میں اضافے اور برآمدات میں کمی نے تجارتی خسارے میں نمایاں اضافہ کیا ہے۔
