اسلام آباد( کامرس ڈیسک)آل پاکستان پبلک ٹرانسپورٹ اونرز فیڈریشن نے ڈیزل کی قیمت میں کمی کے بعد بسوں کے کرایوں میں 15 فیصد کمی کا اعلان کر دیا ہے۔اس سے قبل گڈز ٹرانسپورٹرز نے بھی کرایوں میں 15 فیصد جبکہ منی مزدا گڈز ٹرانسپورٹ ایسوسی ایشن نے 10 فیصد کمی کا اعلان کیا تھا۔پیٹرولیم مصنوعات کی قیمتوں میں کمی کے بعد مختلف شہروں میں ٹرانسپورٹ کرایوں میں رد و بدل دیکھا جا رہا ہے۔ گوجرانوالہ میں ٹرانسپورٹرز نے کرایوں میں کمی کر دی ہے، تاہم مظفر گڑھ میں انٹر سٹی کرائے ابھی تک برقرار ہیں۔دوسری جانب پشاور میں کرایوں میں کمی نہ ہونے پر شہریوں نے تشویش کا اظہار کیا ہے اور ضلعی انتظامیہ سے فوری اقدامات کا مطالبہ کیا ہے۔ٹرانسپورٹرز کا کہنا ہے کہ ریجنل ٹرانسپورٹ اتھارٹی کی جانب سے نیا کرایہ نامہ جاری نہ ہونے کے باعث کرایوں میں مکمل طور پر رد و بدل نہیں کیا جا سکا۔
