ٹرمپ انتظامیہ ایران کے آئل ٹینکروں کو ضبط کرنے پر غور کر رہی ہے:امریکی اخبار

وا شنگٹن( مانیٹرنگ ڈیسک)امریکی اخبار وال اسٹریٹ جرنل کے مطابق ٹرمپ انتظامیہ ایران پر دباؤ بڑھانے کے لیے مزید ایرانی آئل ٹینکروں کو ضبط کرنے کے آپشن پر سنجیدگی سے غور کر رہی ہے۔امریکی حکام کے مطابق اس اقدام کا مقصد ایران کی سب سے بڑی آمدنی یعنی تیل کی برآمدات کو نشانہ بنانا ہے۔ اگر یہ منصوبہ عملی شکل اختیار کرتا ہے تو ایران کی معیشت پر نمایاں دباؤ پڑ سکتا ہے، تاہم اسے متعدد رکاوٹوں کا سامنا ہے۔اہم خدشہ ایران کی ممکنہ جوابی کارروائی ہے، جسے امریکی عہدیدار تقریباً یقینی ردعمل قرار دے رہے ہیں۔ واشنگٹن کو اندیشہ ہے کہ ایران خطے میں امریکی اتحادیوں کے آئل ٹینکروں کو نشانہ بنا سکتا ہے یا آبنائے ہرمز میں بارودی سرنگیں بچھا کر عالمی تیل کی ترسیل متاثر کر سکتا ہے۔یہ اقدامات عالمی تیل کی مارکیٹ اور خطے کی سلامتی کے لیے بھی تشویش کا باعث بن سکتے ہیں۔