واشنگٹن( مانیٹرنگ ڈیسک) امریکی صدر ڈونلڈ ٹرمپ نے کہا ہے کہ ایران جوہری ہتھیار تیار نہ کرنے کی شرط پر ختم ہونے والی پانچ ماہ کی جنگ کے نقصانات کا معاوضہ امریکا سے طلب کررہا ہے، تاہم امریکا بھی ایران سے جنگی نقصان کی تلافی کا مطالبہ کرے گا۔سماجی رابطے کی ویب سائٹ پر جاری بیان میں ڈونلڈ ٹرمپ نے کہا کہ امریکا ایرانی حملوں میں ہلاک اور زخمی ہونے والے امریکی شہریوں کے لیے معاوضہ مانگے گا۔ ان کے مطابق جنرل قاسم سلیمانی کی قیادت میں ہونے والی کارروائیوں کے متاثرین کو بھی معاوضہ ملنا چاہیے۔امریکی صدر نے کہا کہ یو ایس ایس کول حملے میں جان سے جانے والے افراد کے اہلخانہ کو بھی معاوضہ دیا جانا چاہیے، جبکہ ایران میں گزشتہ 50 برس کے دوران مظاہروں میں ہلاک ہونے والوں کے خاندان بھی معاوضے کے مستحق ہیں۔ٹرمپ نے دعویٰ کیا کہ ایران میں گزشتہ پانچ ماہ کے دوران 52 ہزار افراد ہلاک ہوئے ہیں۔ انہوں نے واضح کیا کہ ایران سے جنگی نقصانات کی تلافی کا مطالبہ مستقبل میں ہونے والے تمام مذاکرات کا باضابطہ حصہ ہوگا۔امریکی صدر کا کہنا تھا کہ اگر ایران امریکا سے جنگی نقصانات کا معاوضہ طلب کرتا ہے تو امریکا بھی ایران سے اپنے نقصانات کی تلافی کا مطالبہ کرے گا۔
