واشنگٹن( مانیٹرنگ ڈیسک) امریکی صدر ڈونلڈ ٹرمپ نے کہا ہے کہ اسرائیلی وزیراعظم بنیامین نیتن یاہو انہیں جنگ میں مصروف رکھنا چاہتے ہیں، جبکہ ایران کی جوہری سرگرمیوں سے متعلق معلومات امریکا کے بجائے پوری دنیا کے سامنے ہونی چاہئیں۔امریکی میڈیا سے گفتگو کرتے ہوئے ڈونلڈ ٹرمپ کا کہنا تھا کہ انہیں نیتن یاہو کی فراہم کردہ معلومات کی ضرورت نہیں، کیونکہ اسرائیلی وزیراعظم چاہتے ہیں کہ امریکا جنگی معاملات میں شامل رہے، اسی لیے وہ معلومات دینے کی بات کر رہے ہیں۔ٹرمپ نے کہا کہ امریکا ایران کی جوہری سرگرمیوں پر مسلسل نظر رکھے ہوئے ہے اور انہیں معلوم ہے کہ کوہ کولانگ کے مقام پر کیا صورتحال ہے۔انہوں نے دعویٰ کیا کہ یہ کوئی بڑا مسئلہ نہیں، امریکا پہلے ہی ایران کے جوہری مقامات کو نشانہ بنا چکا ہے، جبکہ اگر ایران کسی معاہدے پر نہ پہنچا تو کوہ کولانگ کو بھی آسانی سے تباہ کیا جا سکتا ہے۔امریکی صدر کا یہ بیان ایسے وقت میں سامنے آیا ہے جب وائٹ ہاؤس میں ان کی اسرائیلی وزیراعظم بنیامین نیتن یاہو سے ملاقات متوقع ہے۔خبر ایجنسی کے مطابق امکان ہے کہ نیتن یاہو ملاقات کے دوران ٹرمپ کو ایران کی جوہری سرگرمیوں سے متعلق معلومات فراہم کرنے کی کوشش کریں گے۔
