بنوں میں دو دھماکے، 7 افراد جاں بحق، امدادی کارروائیوں کے دوران دوسرا دھماکہ

بنوں ( پاکستا خبر)بنوں کے نیم قبائلی علاقے برغنتو میں یکے بعد دیگرے دو دھماکوں کے نتیجے میں 7 افراد جاں بحق جبکہ 3 افراد زخمی ہو گئے۔ڈسٹرکٹ پولیس آفیسر یاسر آفریدی کے مطابق پہلا دھماکہ تھانہ احمد زئی کی حدود میں اس وقت ہوا جب سواریوں سے بھری ڈاٹسن گاڑی قریب سے گزر رہی تھی، جبکہ امدادی کارروائیوں کے دوران دوسرا دھماکہ بھی ہو گیا۔انہوں نے بتایا کہ متاثرہ گاڑی میں ہاتھی خیل قبیلے کے افراد سوار تھے، جبکہ جاں بحق افراد اور زخمیوں کو قریبی اسپتال منتقل کر دیا گیا ہے۔ زخمیوں میں بچے بھی شامل ہیں۔ڈی پی او کے مطابق سکیورٹی اداروں نے علاقے کو گھیرے میں لے کر شواہد اکٹھے کرنا شروع کر دیے ہیں اور سرچ آپریشن بھی جاری ہے۔واقعے کے دوران تحصیلدار سب ڈویژن وزیر عابد اللہ کی گاڑی بھی دھماکے کی زد میں آئی تاہم وہ محفوظ رہے۔صدر مملکت آصف علی زرداری اور وزیراعظم شہباز شریف نے واقعے کی شدید مذمت کرتے ہوئے قیمتی جانوں کے ضیاع پر افسوس کا اظہار کیا ہے۔وزیراعظم نے زخمیوں کو فوری طبی سہولیات فراہم کرنے اور واقعے کی شفاف تحقیقات کی ہدایت دیتے ہوئے کہا کہ دہشت گردی انسانیت اور ملک کے امن کے خلاف سازش ہے، جسے ہر صورت ناکام بنایا جائے گا۔