کوٹلی( پاکستان خبر) آزاد جموں و کشمیر کے حلقہ کوٹلی میں مبینہ انتخابی ضابطہ خلاف ورزی پر الیکشن کمیشن نے فوری کارروائی کرتے ہوئے دو پریزائیڈنگ افسران کو معطل کرکے گرفتار کر لیا ہے، جبکہ ان کے قبضے سے پولنگ بیگز بھی تحویل میں لے لیے گئے ہیں۔الیکشن کمیشن کے ترجمان کے مطابق دونوں پریزائیڈنگ افسران مقررہ پولنگ اسٹیشنوں پر جانے کے بجائے ایک نجی رہائش گاہ پر چلے گئے تھے۔واقعے کی اطلاع ملتے ہی ریٹرننگ آفیسر نے فوری کارروائی کرتے ہوئے پولنگ بیگز اپنی تحویل میں لے لیے۔ترجمان نے بتایا کہ دونوں افسران کو معطل کرنے کے بعد گرفتار کر لیا گیا ہے، جبکہ انتخابی عمل کو جاری رکھنے کے لیے ان کی جگہ نئے پریزائیڈنگ افسران تعینات کرکے متعلقہ پولنگ اسٹیشنوں پر روانہ کر دیے گئے ہیں تاکہ ووٹنگ کا عمل بلا رکاوٹ جاری رہ سکے۔
