لاہور ( سپورٹس ڈیسک)متحدہ عرب امارات کے کرکٹر آصف خان پر ممنوعہ مواد کے استعمال کے باعث بین الاقوامی کرکٹ کونسل نے 15 ماہ کی پابندی عائد کردی۔بین الاقوامی کرکٹ کونسل کے مطابق آصف خان کا 8 ستمبر 2025ء کو ڈوپ ٹیسٹ لیا گیا تھا، جس میں ممنوعہ مادے کی موجودگی سامنے آئی۔ 36 سالہ کرکٹر نے انسدادِ ممنوعہ ادویات کے ضابطے کی خلاف ورزی تسلیم کرتے ہوئے سزا قبول کرلی۔پابندی کا اطلاق 8 ستمبر 2025ء سے ہوگا اور یہ 7 دسمبر 2026ء تک جاری رہے گی۔ اس کے علاوہ 8 ستمبر سے 29 دسمبر 2025ء تک کے ان کے انفرادی نتائج بھی منسوخ کردیے گئے ہیں، جس کے باعث اس عرصے کے تمغے، پوائنٹس، انعامی رقم اور دیگر اعزازات واپس لیے جائیں گے۔آصف خان نے 2022ء میں متحدہ عرب امارات کی جانب سے بین الاقوامی کرکٹ کا آغاز کیا تھا۔ وہ اب تک 38 ایک روزہ اور 56 بیس اوورز کے بین الاقوامی میچوں میں ملک کی نمائندگی کرچکے ہیں۔
