اماراتی صدر نے نیتن یاہو کو حماس حملے سے خبردار کیا تھا: نیویارک ٹائمز

نیو یارک ( مانیٹرنگ ڈیسک) نیویارک ٹائمز نے دعویٰ کیا ہے کہ متحدہ عرب امارات کے صدر شیخ محمد بن زاید آل نہیان نے اکتوبر 2023 کے حماس حملے سے قبل اسرائیلی وزیراعظم بنیامین نیتن یاہو کو ممکنہ بڑے حملے سے خبردار کیا تھا۔رپورٹ کے مطابق ستمبر 2023 کے آخر میں اماراتی صدر نے نیتن یاہو سے رابطہ کرکے انہیں بتایا تھا کہ حماس بڑے حملے کی تیاری پر غور کر رہی ہے۔ دو ذرائع نے اس گفتگو سے واقفیت یا اس میں شریک شخص سے بریفنگ ملنے کی بنیاد پر اس رابطے کی تصدیق کی۔نیویارک ٹائمز کے مطابق یہ دعویٰ ابتدائی طور پر اسرائیلی اخبار ہآرتس نے شائع کیا تھا، تاہم اس وقت ٹائمز نے اسے آزادانہ طور پر تصدیق شدہ قرار نہیں دیا تھا۔رپورٹ میں بتایا گیا کہ یکم اکتوبر 2023 کو نیتن یاہو نے اعلیٰ اسرائیلی سکیورٹی حکام کے ساتھ غزہ کی صورتحال پر اجلاس کیا، تاہم اجلاس کے منٹس میں اماراتی انتباہ کا کوئی ذکر نہیں تھا۔ پانچ سابق اعلیٰ اسرائیلی سکیورٹی حکام نے بھی بتایا کہ یہ اطلاع سکیورٹی قیادت تک نہیں پہنچی تھی۔رپورٹ کے مطابق اجلاس میں بعض سکیورٹی حکام نے حماس رہنماؤں کے خلاف کارروائی کی تجویز دی، جبکہ نیتن یاہو نے غزہ میں کشیدگی کم رکھنے پر زور دیا اور سعودی عرب کے ساتھ ممکنہ سفارتی تعلقات متاثر ہونے کا خدشہ ظاہر کیا۔دوسری جانب نیتن یاہو نے اس بات کی تردید کی ہے کہ انہیں ذاتی طور پر اماراتی صدر کی جانب سے ایسا کوئی انتباہ موصول ہوا تھا۔