لندن( مانیٹرنگ ڈیسک)برطانیہ میں ایئر ٹریفک سروسز کے نظام میں خرابی کے باعث مسلسل تیسرے روز بھی پروازوں کا شیڈول شدید متاثر ہوا اور مزید 3 ہزار 500 پروازیں متاثر ہوئیں۔ایئرپورٹ کے اعداد و شمار کے مطابق تین روز کے دوران متاثر ہونے والی پروازوں کی مجموعی تعداد 12 ہزار سے تجاوز کرگئی ہے۔فلائٹ شیڈول کے مطابق لندن کے ہیتھرو ایئرپورٹ سے مزید 60 پروازیں منسوخ جبکہ 729 تاخیر کا شکار ہوئیں۔گیٹ وک ایئرپورٹ پر 17 پروازیں منسوخ اور 529 میں تاخیر ہوئی، جبکہ مانچسٹر ایئرپورٹ کی 5 پروازیں منسوخ اور 403 تاخیر کا شکار ہوئیں۔اسٹینسٹڈ ایئرپورٹ کی 349، ایڈنبرا کی 222، برمنگھم کی 193 اور برسٹل کی 127 پروازیں متاثر ہوئیں۔اسی طرح گلاسگو کی مزید 124، بیلفاسٹ کی 87 اور لوٹن ایئرپورٹ کی 240 پروازیں بھی متاثر ہوئیں۔ایئرپورٹ ڈیٹا کے مطابق تین روز میں مجموعی طور پر 2 ہزار 500 پروازیں منسوخ جبکہ 9 ہزار 500 تاخیر کا شکار ہوچکی ہیں۔ دوسری جانب ایئر ٹریفک سروسز میں خرابی کے باعث برطانیہ بھر میں تقریباً 20 لاکھ مسافر متاثر ہوئے ہیں۔
