انڈر اٹھارہ نیشنل ہاکی چیمپئن شپ کا شیڈول جاری، سنسنی خیز مقابلوں کی تیاری

لاہور( سپورٹس ڈیسک)یوتھ انڈر اٹھارہ نیشنل ہاکی چیمپئن شپ دو ہزار چھبیس کے انعقاد کا اعلان کر دیا گیا ہے، ایونٹ نو اپریل سے شروع ہو کر انیس اپریل تک جاری رہے گا، جس میں ملک بھر سے سولہ ٹیمیں ٹائٹل کے لیے مدمقابل ہوں گی۔پاکستان ہاکی فیڈریشن کے زیر اہتمام ہونے والے اس ٹورنامنٹ میں ٹیموں کو چار گروپس میں تقسیم کیا گیا ہے تاکہ مقابلوں کو مزید دلچسپ بنایا جا سکے۔پہلے مرحلے کے میچز چودہ اپریل تک مسلسل جاری رہیں گے، جبکہ پندرہ اپریل کو آرام کا دن رکھا گیا ہے۔ اس کے بعد سولہ اپریل کو کوارٹر فائنل اور سترہ اپریل کو سیمی فائنل مقابلے کھیلے جائیں گے۔ایونٹ کا فائنل اور تیسری پوزیشن کا میچ انیس اپریل کو ہوگا، جبکہ فائنل مقابلہ دوپہر ساڑھے تین بجے شروع ہوگا۔افتتاحی روز چار اہم میچز کھیلے جائیں گے، جن میں مختلف ٹیمیں ایک دوسرے کے مدمقابل ہوں گی اور شائقین کو سنسنی خیز مقابلے دیکھنے کو ملیں گے۔یہ چیمپئن شپ نوجوان کھلاڑیوں کے لیے اپنی صلاحیتیں منوانے کا بہترین موقع ثابت ہوگی اور اسی پلیٹ فارم سے مستقبل کے باصلاحیت کھلاڑی قومی سطح پر ابھر کر سامنے آئیں گے۔