آئی پی ایل میچ میں ناخوشگوار واقعہ، چیئر لیڈرز سے نامناسب رویے پر سیکیورٹی متحرک

لاہور ( سپورٹس ڈیسک)انڈین پریمیئر لیگ (آئی پی ایل) میں لکھنؤ سپر جائنٹس اور پنجاب کنگز کے درمیان کھیلے گئے میچ کے دوران اسٹیڈیم میں ناخوشگوار واقعہ پیش آیا، جب کچھ شائقین کی جانب سے چیئر لیڈرز کے ساتھ نامناسب رویے کی اطلاعات سامنے آئیں۔بھارتی میڈیا رپورٹس کے مطابق میچ کے دوران چند افراد نے چیئر لیڈرز کی پرفارمنس کے وقت نامناسب اشارے کیے، جس پر سیکیورٹی اہلکاروں نے فوری مداخلت کرتے ہوئے صورتحال کو قابو میں کیا۔وائرل ہونے والی ویڈیو میں ایک چیئر لیڈر کو شائقین کے رویے پر واضح طور پر پریشان دیکھا گیا، جو انہیں رکنے کا اشارہ کر رہی تھیں۔واقعے کے بعد متعلقہ افراد کو نشاندہی پر اسٹیڈیم سے ہٹا دیا گیا جبکہ انتظامیہ نے اضافی سیکیورٹی اہلکار تعینات کر دیے تاکہ آئندہ ایسے واقعات سے بچا جا سکے۔اسٹیڈیم انتظامیہ نے واضح کیا ہے کہ میچ کے دوران کسی بھی قسم کی بدتمیزی یا ہراسانی برداشت نہیں کی جائے گی اور ضابطہ اخلاق کی خلاف ورزی پر سخت کارروائی کی جائے گی۔