لاہور میں انوکھا انکشاف: ایک شہری کے نام پر 1743 گاڑیاں اور 28 لاکھ سے زائد کے ای چالان

 لاہور( پاکستان خبر)لاہور میں ایک شہری کے نام پر ہزاروں گاڑیوں کی رجسٹریشن اور لاکھوں روپے کے ای چالان کا حیران کن انکشاف سامنے آیا ہے۔ٹریفک پولیس کے مطابق مسلم ٹاؤن میں جنرل ہولڈ اپ کے دوران موٹرسائیکل کی جانچ پڑتال کے وقت یہ معاملہ سامنے آیا کہ شہری محمد جمشید کے نام پر مجموعی طور پر 1743 موٹرسائیکلیں، رکشے اور دیگر گاڑیاں رجسٹرڈ ہیں۔مزید تحقیقات میں یہ بھی معلوم ہوا کہ محمد جمشید کے نام پر 2295 واجب الادا ای چالان موجود ہیں جن کی مجموعی مالیت 28 لاکھ 25 ہزار 700 روپے بنتی ہے۔سی ٹی او لاہور عبدالرحیم شیرازی نے اس صورتحال کو غیر معمولی قرار دیتے ہوئے کہا ہے کہ معاملے کی مکمل تحقیقات جاری ہیں۔ٹریفک پولیس کے مطابق مذکورہ شہری قسطوں پر موٹرسائیکلیں، رکشے اور گاڑیاں فروخت کرنے کا کاروبار کرتا ہے، جبکہ معاملے کی مزید چھان بین کے لیے سیف سٹیز اتھارٹی اور ایکسائز ڈیپارٹمنٹ سے بھی رابطہ کر لیا گیا ہے۔