امریکا ایران معاہدہ: دستخطی تقریب برگن اسٹاک میں ہوگی، سوئس وزارتِ خارجہ کی تصدیق

برن( مانیٹرنگ ڈیسک) برن میں سوئٹزرلینڈ کی وزارتِ خارجہ نے تصدیق کی ہے کہ امریکا اور ایران کے درمیان مفاہمتی یادداشت پر دستخط کی تقریب ملک کے معروف سیاحتی مقام برگن اسٹاک میں منعقد ہوگی۔وزارتِ خارجہ کے مطابق اس مقام کا انتخاب فریقین اور ثالثوں کی مشاورت سے کیا گیا ہے، جبکہ سوئٹزرلینڈ اس پورے عمل میں سہولت کار کا کردار ادا کر رہا ہے۔ترجمان نے بتایا کہ سوئٹزرلینڈ گزشتہ کئی دنوں سے امریکا، ایران، پاکستان اور قطر کے ساتھ مسلسل رابطے میں ہے اور ملاقات کے لیے سفارتی و عملی ماحول فراہم کر رہا ہے۔واضح رہے کہ معاہدے پر دستخط کی تقریب کی میزبانی پاکستان کرے گا، اور وزیراعظم شہباز شریف اس مقصد کے لیے کل سوئٹزرلینڈ روانہ ہوں گے۔