امریکا ایران کشیدگی میں اضافہ، ٹرمپ کا تہران سے ہتھیار ڈالنے کا مطالبہ

واشنگٹن/تہران( مانیٹرنگ ڈیسک) ایران اور امریکا کے درمیان جاری کشیدگی مزید بڑھ گئی ہے، امریکی صدر ڈونلڈ ٹرمپ نے ختم ہونے والی مفاہمتی یادداشت میں توسیع سے انکار کرتے ہوئے ایران سے جنگ کے خاتمے کے لیے ہتھیار ڈالنے کا مطالبہ کردیا۔ٹرمپ نے کہا کہ امریکا ایران کے ساتھ مفاہمتی یادداشت میں توسیع کا ارادہ نہیں رکھتا، جس کی مدت پیر کو ختم ہوگئی۔ انہوں نے دعویٰ کیا کہ امریکی حکام ایرانی پاسداران انقلاب سے مذاکرات کر رہے ہیں، تاہم ایرانی پاسداران انقلاب نے اس دعوے کی تردید کردی۔دوسری جانب ایرانی حکام نے واضح کیا ہے کہ مفاہمتی یادداشت کی مدت ختم ہونے کے بعد تہران امریکا کے خلاف مزید سخت حکمت عملی اختیار کرسکتا ہے۔ایرانی وزارت خارجہ کے ترجمان اسماعیل بقائی نے کہا کہ امریکی خلاف ورزیوں کے باعث مذاکرات کے لیے مقررہ 60 روزہ مدت بے معنی ہوچکی ہے، ایران کسی دباؤ یا دھمکی کے سامنے اپنی پالیسی تبدیل نہیں کرے گا اور حملے کی صورت میں جواب دینے کے لیے تیار ہے۔آبنائے ہرمز میں جاری کشیدگی اور اس اہم بحری گزرگاہ پر امریکی کنٹرول کے دعووں نے بھی خطے میں مزید تشویش پیدا کردی ہے۔