واشنگٹن( سپورٹس ڈیسک)امریکا نے ایران کی قومی فٹبال ٹیم کو آئندہ فٹبال عالمی کپ میں شرکت کے لیے ویزے جاری کر دیے ہیں۔خبر رساں ادارے رائٹرز کے مطابق ایرانی ٹیم کو ویزے جاری کیے جانے کی تصدیق وائٹ ہاؤس کے ایک اہلکار نے جمعے کے روز کی۔اس سے قبل میکسیکو میں تعینات ایران کے سفیر ابوالفضل پسندیدہ نے جمعرات کی شب بتایا تھا کہ قومی اسکواڈ کو اب تک امریکی ویزے موصول نہیں ہوئے تھے۔ تاہم وائٹ ہاؤس کے مطابق بعد ازاں تمام ضروری ویزے فوری طور پر جاری کر دیے گئے۔ایران کی ٹیم گروپ جی میں شامل ہے اور وہ اپنی مہم کا آغاز 15 جون کو لاس اینجلس میں نیوزی لینڈ کے خلاف میچ سے کرے گی۔ اسی شہر میں وہ بیلجیم کے خلاف دوسرا میچ بھی کھیلے گی جبکہ گروپ کا آخری میچ سیئٹل میں مصر کے خلاف شیڈول ہے۔واضح رہے کہ ایران اور امریکا کے درمیان جاری کشیدہ تعلقات کے باعث ایران کی ورلڈ کپ میں شرکت غیر یقینی صورتحال سے دوچار تھی، تاہم ایونٹ شروع ہونے سے چند روز قبل ویزوں کے اجرا کے بعد یہ معاملہ حل ہو گیا ہے۔
