واشنگٹن( مانیٹرنگ ڈیسک)امریکی صدر ڈونلڈ ٹرمپ نے کہا ہے کہ ایران میں امریکی بری فوج کے اہلکاروں کی تعیناتی کو خارج از امکان قرار نہیں دیا جا سکتا۔ صدر ٹرمپ نے کہا کہ اگر ضرورت ہوئی تو فوج بھیجی جا سکتی ہے، اور ایران کے خلاف سب سے بڑی شدت کے فضائی حملے ابھی باقی ہیں۔ٹرمپ نے دعویٰ کیا کہ ان حملوں میں تقریباً 49 اعلیٰ ایرانی رہنما مارے گئے، جن میں فوجی اور سکیورٹی قیادت شامل ہے۔ حملوں کا مقصد ایران کو ایٹمی ہتھیار بنانے سے روکنا، ان کے بیلسٹک میزائل اور بحریہ کی صلاحیتیں تباہ کرنا تھا۔صدر ٹرمپ نے چار امریکی فوجیوں کی ہلاکت کا ذکر کرتے ہوئے کہا کہ ان کی یاد میں مشن کو غیر متزلزل عزم کے ساتھ جاری رکھا جائے گا۔ انہوں نے عرب ممالک کی شمولیت پر بھی حیرت کا اظہار کیا اور ایران کی موجودہ قیادت کے جوہری مذاکرات میں تاخیر کے حوالے سے تنقید کی۔
