لاہور ( کامرس ڈیسک) گزشتہ دو ہفتوں کے دوران سبزیوں اور پھلوں کی قیمتوں میں نمایاں اضافہ ہوا ہے۔ دکانداروں کے مطابق سبزیوں اور پھلوں کے نرخ 100 سے 150 روپے فی کلو تک بڑھ گئے جبکہ پھلوں کی پیٹیوں کی قیمتوں میں ایک ہزار سے 2 ہزار روپے تک اضافہ ہوا ہے۔دکانداروں کے مطابق کدو 150 سے بڑھ کر 200، گوبھی 150 سے 220، بند گوبھی 150 سے 250 اور میتھی 300 سے بڑھ کر 400 روپے فی کلو ہوگئی۔اسی طرح شملہ مرچ 300 سے 350، پیاز 120 سے 200 اور ٹماٹر 200 سے بڑھ کر 250 روپے فی کلو ہوگئے۔پھلوں میں 6 کلو آڑو کا کارٹن 950 روپے، سیب کی پیٹی 2 ہزار سے بڑھ کر 3 ہزار، آم کی پیٹی 3 ہزار سے 5 ہزار جبکہ انگور کی پیٹی 4500 سے بڑھ کر 5 ہزار روپے ہوگئی۔دکانداروں کا کہنا ہے کہ منڈی سے ہی سبزیاں اور پھل مہنگے داموں مل رہے ہیں۔
