لاہور ( سپورٹس ڈیسک)پاکستان کرکٹ ٹیم کے سابق کپتان وسیم اکرم نے حکام سے مطالبہ کیا ہے کہ 1992ء کا ورلڈ کپ جیتنے والے کپتان اور بانیٔ پاکستان تحریکِ انصاف کے ساتھ انصاف پر مبنی رویہ اختیار کیا جائے۔انگلینڈ کے سابق کپتان ایان بوتھم کے ساتھ مشترکہ میزبانی میں نشر ہونے والے پوڈکاسٹ ’اولڈ بوائز، نیو بالز‘ میں گفتگو کرتے ہوئے وسیم اکرم نے ان تمام سابق کپتانوں کا شکریہ ادا کیا جنہوں نے حال ہی میں بانیٔ پی ٹی آئی کے حق میں درخواست پر دستخط کیے۔وسیم اکرم 1992ء کا ورلڈ کپ جیتنے والی پاکستانی ٹیم کا اہم حصہ تھے۔ انہوں نے کہا کہ انہیں سابق کپتان کی فکر رہتی ہے اور وہ انہیں دوست کی حیثیت سے یاد کرتے ہیں، جبکہ سرپرست اور رہنما کے طور پر بھی ان کی کمی محسوس ہوتی ہے۔سابق فاسٹ بالر کا کہنا تھا کہ گزشتہ تین برس سے انہوں نے بانیٔ پی ٹی آئی کی تصویر تک نہیں دیکھی۔وسیم اکرم نے حکومت سے اپیل کی کہ بانیٔ پی ٹی آئی کے ساتھ بھی اسی طرح منصفانہ برتاؤ کیا جائے جیسا ماضی میں دیگر سیاست دانوں کے ساتھ کیا جاتا رہا ہے۔
