پشاور( پاکستان خبر) وزیراعلیٰ خیبر پختونخوا سہیل آفریدی نے کہا ہے کہ صوبے کی پولیس کو پنجاب پولیس کے طرز پر کام نہیں کرنے دیا جائے گا اور عوام کو مؤثر ریلیف کی فراہمی یقینی بنائی جائے گی۔وزیراعلیٰ کی زیر صدارت صوبے میں پولیس کی کارکردگی سے متعلق اجلاس ہوا، جس میں پولیس امور اور عوامی شکایات کے ازالے کے حوالے سے بریفنگ دی گئی۔اجلاس کو بتایا گیا کہ جنوری سے اگست کے دوران کمپلینٹ سیل کو مجموعی طور پر 3 ہزار 551 شکایات موصول ہوئیں، جن میں سے 498 شکایات قانونی پیچیدگیوں کے باعث قابلِ عمل نہیں تھیں۔سہیل آفریدی نے ہدایت کی کہ کمپلینٹ سیل کے ذریعے عوام کو فراہم کیے جانے والے ریلیف سے شہریوں کو بھرپور انداز میں آگاہ کیا جائے۔وزیراعلیٰ نے پشاور کے پوسٹ گریجویٹ کالج آف نرسنگ میں طلبہ کے احتجاج کے دوران ہنگامہ آرائی اور پولیس کی جانب سے طلبہ پر مبینہ تشدد کے واقعے کا بھی نوٹس لیا۔انہوں نے واضح کیا کہ کسی شخص کو قانون ہاتھ میں لینے کی اجازت نہیں دی جائے گی اور نرسنگ کالج واقعے میں ملوث افراد کے خلاف قانون کے مطابق کارروائی عمل میں لائی جائے گی۔
