اسلام آباد( کامرس ڈیسک)وفاقی ادارہ شماریات کے مطابق اگست 2026 کے دوسرے ہفتے کے دوران ملک میں ہفتہ وار مہنگائی کی شرح میں 0.15 فیصد اضافہ ہوا، جس کے بعد سالانہ بنیاد پر مہنگائی 9.11 فیصد تک پہنچ گئی۔رپورٹ کے مطابق 51 ضروری اشیاء میں سے ایک ہفتے کے دوران 20 کی قیمتوں میں اضافہ، 9 میں کمی جبکہ 22 اشیاء کی قیمتیں مستحکم رہیں۔ہفتہ وار بنیاد پر پیاز کی قیمت میں 24.68 فیصد نمایاں اضافہ ہوا، جبکہ چنے کی دال 3.35 فیصد، مرغی 2.45 فیصد اور ایل پی جی 0.67 فیصد مہنگی ہوئی۔ چائے، سرسوں کا تیل، دہی اور مسور کی دال کی قیمتوں میں بھی اضافہ ریکارڈ کیا گیا۔سالانہ بنیاد پر ٹماٹر کی قیمت میں 143.77 فیصد، پیاز میں 125.75 فیصد اور گندم کے آٹے میں 77.41 فیصد اضافہ ہوا۔ ایل پی جی 55.41 فیصد، ڈیزل 34.05 فیصد اور پٹرول 23.02 فیصد مہنگا ہوا۔دوسری جانب ہفتہ وار بنیاد پر پٹرول 2.35 فیصد، ٹماٹر 1.26 فیصد، آلو 0.73 فیصد اور ڈیزل 0.29 فیصد سستا ہوا۔ کیلے، مونگ کی دال، انڈے اور چینی کی قیمتوں میں بھی کمی ریکارڈ کی گئی۔سالانہ بنیاد پر آلو 30 فیصد، چینی 17.93 فیصد اور مرغی 17.45 فیصد سستی ہوئی، جبکہ چنے کی دال، انڈوں اور مونگ کی دال کی قیمتوں میں بھی کمی ہوئی۔
