نیو یارک( ویب ڈیسک)اگر آپ کا واٹس ایپ اکاؤنٹ اچانک بند یا غیر فعال ہوگیا ہے تو ممکن ہے اس کی وجہ آپ کی کوئی غلطی نہیں بلکہ ایپ میں پیدا ہونے والا ایک تکنیکی مسئلہ ہو۔رپورٹس کے مطابق دنیا بھر میں ہزاروں واٹس ایپ صارفین کے اکاؤنٹس عارضی طور پر بلاک ہوگئے، جس کے بعد کئی افراد نے سوشل میڈیا پر اس مسئلے کی شکایات درج کرائیں۔ متاثرہ صارفین کو واٹس ایپ پر اکاؤنٹ کے جائزے سے متعلق پیغام دکھائی دے رہا تھا۔میٹا نے اس مسئلے کی تصدیق کرتے ہوئے کہا ہے کہ یہ ایک تکنیکی خرابی کے باعث پیش آیا، جسے دور کرنے کے لیے اقدامات کیے جا رہے ہیں۔ کمپنی کے مطابق متاثرہ اکاؤنٹس تک صارفین کی دوبارہ رسائی بحال کرنے پر کام جاری ہے۔صارفین کے مطابق اکاؤنٹس کھولنے کی کوشش پر ایک پیغام سامنے آتا ہے جس میں بتایا جاتا ہے کہ اکاؤنٹ اور ڈیوائس کی معلومات کا جائزہ لیا جا رہا ہے تاکہ تصدیق کی جا سکے کہ صارف نے واٹس ایپ کی شرائط کی خلاف ورزی تو نہیں کی، جبکہ 24 گھنٹوں کے اندر نتیجہ بتانے کا کہا جاتا ہے۔واضح رہے کہ دنیا بھر میں واٹس ایپ استعمال کرنے والوں کی تعداد 3 ارب سے زائد ہے، اس لیے معمولی تکنیکی خرابی بھی بڑی تعداد میں صارفین کو متاثر کر سکتی ہے۔میٹا نے مسئلے کا اعتراف تو کر لیا ہے، تاہم کمپنی نے تاحال یہ واضح نہیں کیا کہ کون سے ممالک یا خطے اس خرابی سے متاثر ہوئے اور اس کی اصل وجہ کیا تھی۔
