کیلیفورنیا( ویب ڈیسک)پیغام رسانی کی معروف ایپلی کیشن واٹس ایپ نے صارفین کے لیے کالز میں شرکت کا عمل مزید آسان بنا دیا ہے۔ نئے فیچر کے تحت اب ایسے افراد بھی واٹس ایپ کال میں شامل ہوسکیں گے جن کا اس ایپ پر اکاؤنٹ موجود نہیں۔واٹس ایپ کی بلاگ پوسٹ کے مطابق صارفین کال کا لنک بنا کر ان افراد کے ساتھ شیئر کرسکتے ہیں جو واٹس ایپ استعمال نہیں کرتے۔ لنک موصول کرنے والے افراد اسے اپنے کمپیوٹر کے ویب براؤزر میں کھول کر کال میں شرکت کرسکیں گے۔کمپنی کا کہنا ہے کہ یہ سہولت انفرادی اور گروپ، دونوں طرح کی کالز کے لیے دستیاب ہوگی، جن میں بیک وقت 32 افراد شامل ہوسکتے ہیں۔ لنک کے ذریعے شریک ہونے والے افراد کی گفتگو کو بھی اینڈ ٹو اینڈ انکرپشن کے ذریعے محفوظ رکھا جائے گا۔نئے فیچر کے تحت صارفین کو ہاتھ اٹھانے، اسکرین شیئر کرنے اور دیگر بنیادی سہولیات بھی میسر ہوں گی۔ یہ کالز مفت ہوں گی اور ان کے دورانیے پر بھی کوئی پابندی نہیں ہوگی۔واٹس ایپ کال لنک بنانے کا طریقہکال لنک بنانے کے لیے صارفین کو واٹس ایپ ایپلی کیشن میں موجود کالز کے حصے میں جانا ہوگا، جہاں جمع (+) کے نشان پر کلک کرکے لنک تیار کیا جاسکتا ہے۔لنک بنانے کے بعد اسے ان افراد کے ساتھ شیئر کیا جاسکتا ہے جنہیں کال میں شامل کرنا مقصود ہو۔ لنک موصول کرنے والے افراد اسے ویب براؤزر میں کھول کر اپنا نام درج کریں گے اور میزبان کی اجازت ملنے کے بعد گفتگو میں شریک ہوسکیں گے۔واضح رہے کہ کال لنک بنانے کے لیے واٹس ایپ اکاؤنٹ ضروری ہوگا، تاہم اس لنک کے ذریعے کال میں شرکت کرنے والوں کے لیے اکاؤنٹ بنانا لازمی نہیں ہوگا۔واٹس ایپ نے مزید بتایا کہ مستقبل قریب میں کال لنکس کو گوگل کیلنڈر اور مائیکروسافٹ آؤٹ لک کے ساتھ مربوط کرنے کے لیے اضافی سہولت متعارف کرانے کا منصوبہ ہے۔ اس اقدام سے صارفین کو آن لائن ملاقاتوں اور گفتگو کا وقت طے کرنے میں مزید آسانی ہوگی۔
