واٹس ایپ میں تصاویر کا سائز تبدیل کرنے کیلئے نیا اے آئی فیچر متعارف

کیلیفورنیا( ویب ڈیسک)واٹس ایپ نے اینڈرائیڈ صارفین کے لیے نئے بیٹا ورژن میں مصنوعی ذہانت پر مبنی فوٹو ایکسپینشن ٹول متعارف کرا دیا ہے، جس کی مدد سے موجودہ تصاویر کو 9:16 فارمیٹ میں تبدیل کیا جاسکے گا۔رپورٹ کے مطابق یہ سہولت واٹس ایپ کے امیج ڈرائنگ ایڈیٹر میں دستیاب ہوگی، جہاں صارف تصویر کھول کر فلٹرز کے حصے میں اس ٹول تک رسائی حاصل کرسکیں گے۔میٹا اے آئی تصویر کا تجزیہ کرکے اس کے اطراف موجود مواد کو مصنوعی ذہانت کی مدد سے بڑھائے گا تاکہ تصویر 9:16 فارمیٹ میں ڈھل جائے۔ صارف نتائج سے مطمئن نہ ہونے کی صورت میں دوبارہ کوشش بھی کرسکیں گے۔یہ فیچر پہلے واٹس ایپ اسٹیٹس میں متعارف کرائے جانے کا امکان ہے، جس کے بعد چیٹس میں بھی دستیاب ہوگا۔ چونکہ یہ سہولت فی الحال آزمائشی مرحلے میں ہے، اس لیے تمام صارفین کے لیے اس کی حتمی دستیابی کی تاریخ واضح نہیں۔