واٹس ایپ کا نیا فیچر متعارف، اب آواز والے اسٹیکرز بھیجنا ممکن ہوگا

نیویارک (ویب ڈیسک) پیغام رسانی کی معروف ایپلی کیشن واٹس ایپ صارفین کے لیے ایک نیا فیچر متعارف کرانے کی تیاری کر رہی ہے، جس کے ذریعے تصاویر اور ویڈیوز کے ساتھ آواز والے اسٹیکرز بھی تیار کرکے دوسروں کو بھیجے جا سکیں گے۔رپورٹ کے مطابق یہ نیا فیچر واٹس ایپ کے آزمائشی نسخے میں دیکھا گیا ہے۔ اس سہولت کے ذریعے صارفین اپنے موبائل فون میں محفوظ آڈیو فائل استعمال کرنے کے علاوہ اپنی آواز ریکارڈ کرکے بھی صوتی اسٹیکرز بنا سکیں گے۔نئے فیچر کے تحت ایک صوتی اسٹیکر میں زیادہ سے زیادہ 10 سیکنڈ کی آواز شامل کی جا سکے گی۔ واٹس ایپ پر ایسا اسٹیکر موصول ہونے یا بھیجے جانے پر اس کے ساتھ آواز کی علامت بھی دکھائی دے گی، جس پر کلک کرکے صارف آڈیو سن سکے گا۔اس کے علاوہ صارفین ویڈیو سے متحرک اسٹیکر تیار کرتے وقت اس میں موجود آواز بھی شامل کر سکیں گے۔ ایپ خودکار طور پر ویڈیو کے پانچ سیکنڈ کے صوتی حصے کو اسٹیکر کے ساتھ منسلک کر سکے گی۔صارفین کو یہ سہولت بھی حاصل ہوگی کہ وہ ویڈیو کی اصل آواز کے بجائے اپنی ریکارڈ کردہ آواز یا موبائل فون میں محفوظ کسی دوسری آڈیو فائل کو استعمال کرسکیں گے۔اس نئے فیچر کا مقصد واٹس ایپ پر گفتگو کو مزید دلچسپ بنانا اور صارفین کو اپنے جذبات، ردعمل اور پیغامات کا اظہار آواز کے ذریعے کرنے کا ایک نیا طریقہ فراہم کرنا ہے۔ تاہم، فیچر کی تمام صارفین کے لیے دستیابی سے متعلق حتمی اعلان سامنے آنے تک اس کے اجرا کے وقت کے بارے میں یقین سے کچھ نہیں کہا جا سکتا۔