واٹس ایپ نے نامعلوم نمبرز سے تحفظ کیلئے نیا سکیورٹی فیچر متعارف کرا دیا

کیلیفورنیا( ویب ڈیسک) واٹس ایپ نے صارفین کی سکیورٹی کو مزید بہتر بنانے کے لیے ایک نیا حفاظتی فیچر متعارف کرا دیا ہے، جس کے ذریعے نامعلوم نمبروں سے موصول ہونے والے پیغامات کے بارے میں اہم معلومات چیٹ کھولنے سے پہلے ہی دستیاب ہوں گی۔میٹا کی زیرملکیت اس پیغام رسانی ایپ کے تحت اب کسی بھی نامعلوم نمبر سے گفتگو شروع ہونے سے قبل صارف کو ایک خصوصی انتباہ موصول ہوگا۔اس فیچر کا مقصد صارفین کو ممکنہ دھوکہ دہی اور فراڈ کی کوششوں سے آگاہ کرنا ہے تاکہ وہ غیر متوقع پیغامات پر فوری ردعمل دینے کے بجائے صورتحال کا جائزہ لے سکیں۔واٹس ایپ کی جانب سے یہ اپ ڈیٹ اینڈرائیڈ اور آئی او ایس دونوں پلیٹ فارمز کے لیے جاری کی جا رہی ہے۔کمپنی کے مطابق یہ فیچر صارفین کو یہ معلومات فراہم کرے گا کہ متعلقہ نمبر کس ملک میں رجسٹرڈ ہے، آیا اسے رابطوں کی فہرست میں محفوظ کرنا مناسب ہو سکتا ہے اور کیا دونوں افراد کسی مشترکہ گروپ کا حصہ ہیں۔ ان معلومات کی بنیاد پر صارف خود فیصلہ کر سکے گا کہ پیغام کا جواب دینا ہے یا نہیں۔اس عمل کے دوران پیغام بھیجنے والے شخص کو کسی قسم کی اطلاع نہیں دی جائے گی، جس سے صارفین کی رازداری مکمل طور پر محفوظ رہے گی۔کمپنی کے مطابق دھوکہ باز اکثر خود کو جاننے والوں کے طور پر ظاہر کرتے ہوئے نئے نمبر استعمال کرتے ہیں اور صارفین کو گمراہ کرنے کی کوشش کرتے ہیں۔ نیا سکیورٹی فیچر خاص طور پر بیرون ملک رجسٹرڈ نمبروں کی نشاندہی کرے گا، جس سے بین الاقوامی سطح پر ہونے والی دھوکہ دہی کی وارداتوں میں کمی کی توقع کی جا رہی ہے۔