کیلیفورنیا( ویب ڈیسک) واٹس ایپ نے آئی فون صارفین کیلئے تھرڈ پارٹی مصنوعی ذہانت کے ایجنٹس سے براہ راست چیٹ کی سہولت متعارف کرانا شروع کردی، فی الحال یہ محدود صارفین کو دستیاب ہے۔واٹس ایپ کے بیٹا ورژن میں صارف سیٹنگز کے ذریعے ایجنٹ شامل کرسکتا ہے، جبکہ ایک اکاؤنٹ کے ساتھ زیادہ سے زیادہ 5 ایجنٹس منسلک کیے جاسکتے ہیں۔ ایجنٹ کیلئے نام اور پروفائل تصویر بھی منتخب کی جاسکتی ہے۔ایجنٹ کو متعلقہ تھرڈ پارٹی سروس سے جوڑنے کیلئے فراہم کردہ اے پی آئی کلید استعمال کی جاتی ہے، جسے کسی دوسرے شخص سے شیئر نہ کرنے کی ہدایت کی گئی ہے۔کنکشن کے بعد ایجنٹ عام رابطے کی طرح چیٹ فہرست میں دکھائی دیتا ہے اور اس سے مسودے تیار کرنے، نوٹس بنانے یا ذاتی معاون کے طور پر کام لیا جاسکتا ہے۔ واٹس ایپ کے مطابق دیگر مطابقت رکھنے والے خودکار پروگرام بھی اس نظام سے منسلک ہوسکتے ہیں۔رازداری کے تحت ایجنٹ صرف وہی پیغامات پڑھ سکتا ہے جو صارف خود اس کے ساتھ شیئر کرے، اسے عام ذاتی چیٹس، رابطوں یا میڈیا تک آزادانہ رسائی حاصل نہیں ہوگی۔ تاہم تھرڈ پارٹی ایجنٹس سے ہونے والی گفتگو عام واٹس ایپ چیٹس کی طرح اینڈ ٹو اینڈ خفیہ نہیں ہوگی۔یہ سہولت فی الحال منتخب ممالک میں محدود تعداد میں صارفین کیلئے جاری کی جارہی ہے، جبکہ آئی فون کیلئے متعلقہ آزمائشی نسخہ 26.37.10.70 بتایا گیا ہے۔
