کراچی( ویب ڈیسک) میٹا کی جانب سے پرانے اینڈرائیڈ اور آئی او ایس آپریٹنگ سسٹمز پر چلنے والے اسمارٹ فونز میں واٹس ایپ کی رسائی جلد محدود کیے جانے کا امکان ہے۔رپورٹ کے مطابق واٹس ایپ ایسے صارفین کو وارننگ جاری کرے گا جو پرانے آپریٹنگ سسٹم والے فونز پر ایپ استعمال کر رہے ہیں۔ یہ انتباہ واٹس ایپ کے پرانے ورژن کے بجائے فون کے آپریٹنگ سسٹم سے متعلق ہوگا۔آپریٹنگ سسٹم کو مطلوبہ حد تک اپ ڈیٹ نہ کرنے کی صورت میں صارف واٹس ایپ پر دوبارہ لاگ اِن نہیں کرسکے گا اور ایپ تک رسائی ختم ہوجائے گی۔ اگر فون کا نظام اپ ڈیٹ کرنا ممکن نہ ہوا تو واٹس ایپ استعمال کرنے کے لیے نیا اسمارٹ فون لینا پڑے گا۔رپورٹ میں فی الحال یہ واضح نہیں کیا گیا کہ کن پرانے آپریٹنگ سسٹمز پر یہ پابندی عائد ہوگی، تاہم امکان ظاہر کیا گیا ہے کہ چند برس پرانے اینڈرائیڈ اور آئی او ایس فونز اس سے متاثر ہوسکتے ہیں۔واٹس ایپ نے حال ہی میں اینڈرائیڈ 5.0 اور 5.1 کے لیے سپورٹ ختم کرکے اینڈرائیڈ 6 یا اس کے بعد کے نظام کو لازمی قرار دیا تھا۔ اسی طرح 30 نومبر 2026 سے آئی فون پر واٹس ایپ استعمال کرنے کے لیے آئی او ایس 15.5 یا اس کے بعد کا نظام درکار ہوگا۔اس لیے لاگ اِن بلاک ہونے کی وارننگ ممکنہ طور پر ان فونز پر ظاہر ہوسکتی ہے جو مذکورہ تقاضوں سے پرانے آپریٹنگ سسٹمز پر چل رہے ہیں۔
