واٹس ایپ کا نیا فیچر، چیٹ کھولے بغیر تصاویر اور ویڈیوز کا پریویو ممکن

کیلیفورنیا( ویب ڈیسک)واٹس ایپ نے اینڈرائیڈ صارفین کے لیے ایک نیا فیچر متعارف کرانے کی تیاری شروع کردی ہے، جس کے ذریعے چیٹ کھولے بغیر ہی موصول ہونے والی تصاویر، ویڈیوز اور اسٹیکرز کا مختصر پریویو دیکھا جاسکے گا۔رپورٹ کے مطابق یہ سہولت فی الحال واٹس ایپ کے بیٹا ورژن میں آزمائشی طور پر دستیاب ہے۔ نئے فیچر کے تحت ہوم فیڈ میں میڈیا کے لیبل کے ساتھ ایک چھوٹا تھمب نیل بھی دکھائی دے گا۔مثلاً کسی رابطے کی جانب سے تصویر موصول ہونے کی صورت میں ’’فوٹو‘‘ کے لفظ کے ساتھ اسی تصویر کا مختصر منظر بھی نظر آئے گا، جبکہ ویڈیوز اور اسٹیکرز کے لیے بھی اسی نوعیت کا پریویو فراہم کیا جائے گا۔اس فیچر سے بالخصوص ان صارفین کو سہولت ملے گی جنہیں مختلف رابطوں یا گروپس سے بڑی تعداد میں تصاویر اور ویڈیوز موصول ہوتی ہیں، کیونکہ انہیں ہر میڈیا فائل دیکھنے کے لیے بار بار چیٹ کھولنے کی ضرورت نہیں رہے گی۔تاہم فیچر ابھی آزمائشی مرحلے میں ہے، اس لیے عام صارفین کے لیے اس کے اجرا کی حتمی تاریخ سامنے نہیں آئی۔