لاہور( پاکستان خبر) وفاقی وزیر داخلہ محسن نقوی نے پاکستان تحریک انصاف کو خبردار کیا ہے کہ اسلام آباد کی جانب پیش قدمی کی صورت میں سخت کارروائی کی جائے گی، اسلام آباد ہائیکورٹ کا حکم موجود ہے جس پر عملدرآمد یقینی بنایا جائے گا۔لاہور میں پریس کانفرنس کرتے ہوئے محسن نقوی نے کہا کہ احتجاج سے کسی کو فائدہ نہیں ہوگا، تاہم ملکی معیشت کو نقصان پہنچ سکتا ہے۔ پی ٹی آئی کے سنجیدہ سیاستدان بھی لانگ مارچ کے حق میں نہیں ہیں۔وزیر داخلہ نے کہا کہ گزشتہ رات پشاور میں شہدا کی نماز جنازہ کے موقع پر کوئی مقامی وزیر موجود نہیں تھا، سیاسی اختلاف اپنی جگہ لیکن شہدا کے جنازوں میں شرکت نہ کرنا افسوسناک ہے۔انہوں نے پی ٹی آئی کو مشورہ دیا کہ ابھی وقت ہے، ایسے راستے کا انتخاب نہ کیا جائے جہاں واپسی ممکن نہ ہو۔ ان کے مطابق کسی بھی ایسے منصوبے سے گریز کیا جائے جس سے جماعت اور ملک دونوں کو نقصان پہنچے، بصورت دیگر اسلام آباد ہائیکورٹ کے فیصلے پر عملدرآمد کرایا جائے گا۔محسن نقوی نے واضح کیا کہ اس مرتبہ ملک کو 10، 20 روز تک بند رکھنے کی اجازت نہیں دی جائے گی۔ انہوں نے کہا کہ اگر مطالبہ بانی پی ٹی آئی کے اسپتال کے معائنے سے متعلق ہے تو یہ عمل رات کو بھی ہوچکا ہے، جبکہ پی ٹی آئی کے اپنے مطالبات بھی واضح نہیں۔وزیر داخلہ نے کہا کہ بلند و بانگ دعووں سے کوئی فرق نہیں پڑتا، لانگ مارچ کے لیے اسلام آباد آنے کی کوشش کی گئی تو قانون کے مطابق کوئی رعایت نہیں برتی جائے گی۔عالمی سطح پر تیل کی بڑھتی قیمتوں کا ذکر کرتے ہوئے محسن نقوی نے کہا کہ گزشتہ روز بھی بڑی مشکل سے پاکستان کا تیل بردار بحری جہاز گزارا گیا، تاہم حکومت قیمتیں کم رکھنے کے لیے کوششیں کر رہی ہے۔نئے صوبوں کے حوالے سے انہوں نے کہا کہ معاملہ تیزی سے آگے بڑھ رہا ہے اور عوام کی جانب سے نئے صوبوں کی حمایت میں بھی اضافہ ہو رہا ہے۔
