نیویارک( ویب ڈیسک) سائنسدانوں نے سورج کی سطح کی انتہائی واضح نئی تصاویر اور ویڈیوز حاصل کرلی ہیں، جن میں سورج پر پروں سے مشابہ منفرد ساخت پہلی مرتبہ اس قدر تفصیل کے ساتھ دکھائی دی ہے۔رپورٹ کے مطابق یہ تصاویر اور ویڈیوز ہوائی کے ایک جزیرے پر نصب جدید اور طاقتور شمسی دوربین کے ذریعے حاصل کی گئی ہیں۔سائنسی جریدے نیچر میں شائع تحقیق کے مطابق نئی تصاویر میں سورج کی سطح پر پروں جیسی منفرد ساخت نمایاں ہوئی ہے، جس نے سائنسدانوں کی خاص توجہ حاصل کی ہے۔ماہرین کے مطابق یہ ساخت دراصل سورج کے مقناطیسی میدان کی عکاسی کرتی ہے، جہاں انتہائی گرم گیسیں لہروں کی شکل میں حرکت کرتی دکھائی دیتی ہیں۔ سائنسدانوں کا کہنا ہے کہ یہ مشاہدات سورج کی ساخت، مقناطیسی سرگرمی اور شمسی عمل کو سمجھنے میں اہم پیش رفت ثابت ہوں گے۔
