ویمن ٹی ٹوئنٹی ورلڈ کپ وارم اپ میچ: سکاٹ لینڈ نے پاکستان کو 41 رنز سے شکست دے دی

ڈربی ( سپورٹس ڈیسک) ویمن ٹی ٹوئنٹی ورلڈ کپ کے وارم اپ میچ میں سکاٹ لینڈ کی ویمن ٹیم نے پاکستان ویمن ٹیم کو ڈک ورتھ اینڈ لوئس میتھڈ کے تحت 41 رنز سے شکست دے دی۔میچ میں سکاٹ لینڈ نے پہلے بیٹنگ کرتے ہوئے مقررہ اوورز میں 5 وکٹوں کے نقصان پر 187 رنز بنائے۔ کپتان کیتھرین برائس نے شاندار بیٹنگ کا مظاہرہ کرتے ہوئے صرف 43 گیندوں پر 94 رنز اسکور کیے، جن میں 11 چوکے اور 3 چھکے شامل تھے، جبکہ ڈیرسی کارٹر نے 45 رنز کی اننگز کھیلی۔پاکستان کی جانب سے سعدیہ اقبال، تسمیہ رباب اور عائشہ ظفر نے ایک ایک وکٹ حاصل کی۔جوابی اننگز میں پاکستان ویمن ٹیم نے 9 اوورز میں 5 وکٹوں کے نقصان پر 62 رنز بنائے تھے کہ بارش کے باعث کھیل روک دیا گیا اور دوبارہ شروع نہ ہو سکا۔بعد ازاں ڈک ورتھ اینڈ لوئس میتھڈ کے تحت سکاٹ لینڈ کو فاتح قرار دے دیا گیا۔ اس سے قبل سری لنکا ویمن ٹیم بھی پاکستان کو وارم اپ میچ میں شکست دے چکی ہے۔قومی ویمن ٹیم اپنا پہلا ورلڈ کپ میچ بھارت کے خلاف 14 جون کو کھیلے گی۔