ویمنز ٹی ٹوئنٹی ورلڈکپ: ویسٹ انڈیز نے اسکاٹ لینڈ کو سنسنی خیز مقابلے میں 7 رنز سے شکست دے دی

لیڈز ( سپورٹس ڈیسک)آئی سی سی ویمنز ٹی ٹوئنٹی ورلڈکپ میں ویسٹ انڈیز نے اسکاٹ لینڈ کو ایک سنسنی خیز مقابلے کے بعد 7 رنز سے شکست دے دی۔لیڈز میں کھیلے گئے میچ میں ویسٹ انڈیز ویمن ٹیم نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 153 رنز اسکور کیے۔ اسٹیفنی ٹیلر نے شاندار جارحانہ اننگز کھیلتے ہوئے صرف 19 گیندوں پر 47 رنز بنائے، جس میں چار چوکے اور تین چھکے شامل تھے، جبکہ شیمینی کیمبل نے 36 رنز کی اننگز کھیلی۔ اسکاٹ لینڈ کی جانب سے کیتھرین فریزر نے دو وکٹیں حاصل کیں۔جواب میں اسکاٹ لینڈ کی ٹیم ہدف کے تعاقب میں اچھی پوزیشن میں نظر آئی، تاہم آخری اوورز میں مسلسل وکٹیں گرنے کے باعث میچ ان کے ہاتھ سے نکل گیا۔ڈیرسی کارٹر نے 59 رنز کی ذمہ دارانہ اننگز کھیلی، مگر ان کے آؤٹ ہونے کے بعد اسکاٹ لینڈ کی بیٹنگ لائن لڑکھڑا گئی۔ ایلیسا لسٹر نے 33 رنز بنائے لیکن وہ بھی ٹیم کو کامیابی نہ دلا سکیں۔اسکاٹ لینڈ کی پوری ٹیم 20 اوورز میں 146 رنز بنا کر آؤٹ ہو گئی، یوں ویسٹ انڈیز نے میچ 7 رنز سے اپنے نام کر لیا۔