کیلیفورنیا( ویب ڈیسک) یوٹیوب نے مشترکہ ٹی وی استعمال کرنے والے صارفین کیلئے نیا پرائیویسی فیچر متعارف کرا دیا، جس کے ذریعے پروفائل کو چار ہندسوں کے کوڈ سے محفوظ کیا جاسکے گا۔یوٹیوب کے چیف ایگزیکٹو نیل موہن کے مطابق اکاؤنٹ لاک کی سہولت اب دنیا بھر میں صارفین کیلئے دستیاب کی جارہی ہے۔ اس کے ذریعے گھر کے دیگر افراد صارف کا پروفائل، سبسکرپشنز اور ویڈیوز کی سفارشات تک رسائی حاصل نہیں کرسکیں گے۔پروفائل لاک کرنے کیلئے ٹی وی پر یوٹیوب ایپ کی بائیں جانب موجود نیویگیشن بار سے سیٹنگز میں جاکر یہ سہولت فعال کی جاسکتی ہے۔ تاہم ہر ڈیوائس کیلئے الگ لاک ترتیب دینا ہوگا۔صارف کو ہر بار ریموٹ سے کوڈ درج کرنے کی ضرورت بھی نہیں ہوگی، کیونکہ لاک شدہ پروفائل منتخب کرنے کے بعد موبائل فون میں موجود یوٹیوب ایپ سے بھی اسے کھولا جاسکے گا، تاہم اس کیلئے نوٹیفکیشن کی سہولت فعال ہونا ضروری ہے۔کوڈ بھول جانے کی صورت میں ٹی وی اسکرین پر موجود ’’پاس ورڈ بھول گئے‘‘ کے اختیار سے گوگل اکاؤنٹ کی معلومات استعمال کرکے پروفائل دوبارہ کھولا اور نیا کوڈ مقرر کیا جاسکتا ہے۔یوٹیوب نے واضح کیا ہے کہ چار ہندسوں کا کوڈ حقیقی پاس ورڈ کا متبادل نہیں، بلکہ مشترکہ ڈیوائسز پر صارف کی پروفائل رازداری برقرار رکھنے کیلئے بنایا گیا ہے۔
