کیلیفورنیا( ویب ڈیسک)یوٹیوب دنیا کی سب سے مقبول ویڈیو شیئرنگ سروس ہے، تاہم اب پرانے اینڈرائیڈ فون استعمال کرنے والے کچھ صارفین اس کی ایپ سے محروم ہونے جا رہے ہیں۔گوگل نے اعلان کیا ہے کہ اینڈرائیڈ 6 آپریٹنگ سسٹم پر چلنے والے اسمارٹ فونز کے لیے یوٹیوب ایپ کی سپورٹ ختم کی جا رہی ہے۔ جولائی 2026 کے بعد یوٹیوب ایپ استعمال کرنے کے لیے کم از کم اینڈرائیڈ 7 آپریٹنگ سسٹم درکار ہوگا۔البتہ متاثرہ فونز میں یوٹیوب ایپ فوری طور پر بند نہیں ہوگی اور نہ ہی صارفین کا ڈیٹا حذف ہوگا، بلکہ بتدریج ایپ میں مسائل سامنے آئیں گے۔رپورٹس کے مطابق ایپ کھولنے پر صارفین کو سوئچ ٹو یوٹیوب کا پیغام دکھائی دے گا، جس کے بعد انہیں خودکار طور پر فون کے ویب براؤزر میں یوٹیوب کی موبائل ویب سائٹ پر منتقل کر دیا جائے گا۔گوگل کے مطابق یہ فیصلہ اس لیے کیا گیا ہے کہ یوٹیوب میں مسلسل نئے فیچرز شامل کیے جا رہے ہیں، جنہیں پرانے آپریٹنگ سسٹمز مؤثر انداز میں سپورٹ نہیں کر پاتے۔اینڈرائیڈ 6 استعمال کرنے والے صارفین یوٹیوب کی ویڈیوز ویب براؤزر کے ذریعے دیکھ سکتے ہیں، جبکہ مکمل ایپ کا تجربہ حاصل کرنے کے لیے انہیں نیا فون یا جدید اینڈرائیڈ ورژن استعمال کرنا ہوگا۔
