نیویارک( ویب ڈیسک) ویڈیو شیئرنگ پلیٹ فارم یوٹیوب نے کانٹینٹ کریئیٹرز کا دیرینہ مطالبہ پورا کرتے ہوئے شارٹس ویڈیوز کے لیے کسٹم تھمب نیلز کی سہولت متعارف کرا دی ہے۔میڈیا رپورٹس کے مطابق نئے فیچر کے تحت یوٹیوب پارٹنر پروگرام میں شامل تخلیق کار اب اپنی شارٹ ویڈیوز کے لیے اپنی پسند کی تصاویر کو تھمب نیل کے طور پر اپ لوڈ کر سکیں گے۔اس سے قبل صارفین کو صرف ویڈیو کے کسی ایک منظر کو تھمب نیل کے طور پر منتخب کرنے کی اجازت تھی، جس کی وجہ سے منفرد انداز اور برانڈنگ برقرار رکھنا مشکل ہو جاتا تھا۔نئے فیچر کے ذریعے کریئیٹرز اپنی مرضی کے مطابق پرکشش اور پیشہ ورانہ تھمب نیلز استعمال کر سکیں گے، جس سے شارٹس ویڈیوز کی پیشکش بہتر بنانے اور ناظرین کی توجہ حاصل کرنے میں مدد ملے گی۔یوٹیوب کے مطابق کسٹم تھمب نیل کا فیچر صارفین کی جانب سے سب سے زیادہ مانگے جانے والے فیچرز میں شامل تھا۔کمپنی نے بتایا کہ ابتدائی طور پر یہ سہولت یوٹیوب پارٹنر پروگرام کے صارفین کو دی جا رہی ہے، جبکہ مستقبل میں اسے مزید تخلیق کاروں تک بھی وسعت دی جائے گی۔
