یوٹیوب سرچ میں مصنوعی ذہانت کا نیا تجربہ، ویڈیوز سے پہلے خلاصے دکھانے کی تیاری

 کیلیفورنیا( ویب ڈیسک) یوٹیوب اپنے ڈیسک ٹاپ سرچ نتائج میں مکالماتی فیچر ’’Ask YouTube‘‘ کے ابتدائی جائزوں کو شامل کرنے کا تجربہ کر رہا ہے، جس کے تحت صارفین کو کسی ویڈیو پر کلک کرنے سے پہلے ہی مصنوعی ذہانت (اے آئی) سے تیار کردہ خلاصے اور تفصیلی معلومات فراہم کی جاسکیں گی۔یہ اقدام گوگل کی جانب سے اپنے ویڈیو پلیٹ فارم میں تخلیقی مصنوعی ذہانت کو شامل کرنے کی کوششوں کا تسلسل ہے۔ اس سے قبل یوٹیوب نے موبائل صارفین کے لیے بھی ’’Ask YouTube‘‘ فیچر متعارف کرایا تھا۔یوٹیوب کے اعلان کے مطابق، فی الحال اس فیچر کی محدود پیمانے پر آزمائش امریکا میں کی جا رہی ہے۔ اس مرحلے میں صرف وہ منتخب صارفین شامل ہیں جو ڈیسک ٹاپ پر اپنے اکاؤنٹس میں سائن اِن ہیں اور انگریزی زبان میں تلاش کرتے ہیں۔روایتی انداز میں ویڈیوز کی فہرست دکھانے کے بجائے، یوٹیوب بعض سرچ سوالات کے جواب میں نتائج کے صفحے کے بالائی حصے میں مصنوعی ذہانت سے تیار کردہ تفصیلی جائزہ بھی پیش کرسکتا ہے۔یہ سہولت بالخصوص ایسے سوالات کے لیے کارآمد ہوگی جن کے جواب میں وضاحت، رہنمائی یا کسی مہارت کو سیکھنے کی ضرورت ہو۔ مثال کے طور پر، اگر کوئی صارف تلاش کرے کہ رنگ کی گئی دیواروں سے داغ کیسے صاف کیے جائیں تو اسے متعلقہ ویڈیوز کے ساتھ تحریری رہنمائی بھی فراہم کی جاسکتی ہے۔رپورٹ کے مطابق، اے آئی سے تیار کردہ خلاصوں میں تحریری معلومات کے علاوہ متعلقہ ویڈیوز کے اہم حصے اور ان کے وقت کی نشاندہی کرنے والے ٹائم اسٹیمپس بھی شامل ہوں گے، تاکہ صارفین پوری ویڈیو دیکھنے کے بجائے براہِ راست مطلوبہ معلومات تک پہنچ سکیں۔ابتدائی جائزہ دیکھنے والے صارفین ’’Show more‘‘ پر کلک کرکے مصنوعی ذہانت کا مکمل جواب پڑھ سکتے ہیں اور اسی موضوع پر مزید سوالات بھی پوچھ سکتے ہیں۔تاہم، جو صارفین اے آئی سے تیار کردہ معلومات استعمال نہیں کرنا چاہتے، وہ صفحے پر نیچے جاکر یوٹیوب کے روایتی سرچ نتائج دیکھ سکتے ہیں۔اس تجربے کے ذریعے یوٹیوب صارفین کو ویڈیوز کی تلاش اور ان سے معلومات حاصل کرنے کا زیادہ آسان طریقہ فراہم کرنے کی کوشش کر رہا ہے، تاہم فی الحال یہ سہولت محدود صارفین کے لیے آزمائشی مرحلے میں ہے۔