کراچی ( سپورٹس ڈیسک) پاکستان سپر لیگ کے سنسنی خیز مقابلے میں پشاور زلمی نے حیدرآباد کنگز مین کو چار وکٹوں سے شکست دے دی۔نیشنل اسٹیڈیم میں کھیلے گئے میچ میں پشاور زلمی نے ایک سو چھیالیس رنز کا ہدف چھ وکٹوں کے نقصان پر آخری گیند پر حاصل کیا۔زلمی کی جانب سے کپتان بابر اعظم تینتالیس رنز بنا کر نمایاں رہے جبکہ کوشل مینڈس ستائیس اور مائیکل بریس ویل پچیس رنز کے ساتھ اہم کردار ادا کرتے رہے۔ افتخار احمد پندرہ اور عامر جمال چھ رنز کے ساتھ ناٹ آؤٹ رہے۔حیدرآباد کنگز مین کی جانب سے صائم ایوب نے دو کھلاڑیوں کو آؤٹ کیا جبکہ دیگر بولرز نے ایک ایک وکٹ حاصل کی۔اس سے قبل حیدرآباد کنگز مین کی ٹیم پہلے بیٹنگ کرتے ہوئے اٹھارہ اعشاریہ دو اوورز میں ایک سو پینتالیس رنز بنا کر آؤٹ ہو گئی۔ کوشل پریرا اٹھاون رنز کے ساتھ نمایاں رہے جبکہ مارنس لبوشین ستائیس رنز بنا سکے۔پشاور زلمی کی جانب سے افتخار احمد اور سفیان مقیم نے چار چار وکٹیں حاصل کر کے میچ میں اہم کردار ادا کیا۔
