کیلیفورنیا( ویب ڈیسک)مصنوعی ذہانت کی کمپنی اوپن اے آئی کی جانب سے متعارف کرائی گئی 70 ڈالر مالیت کی چیٹ جی پی ٹی برانڈڈ باسکٹ بال لانچ کے صرف 24 گھنٹوں کے اندر فروخت ہو گئی، حالانکہ سوشل میڈیا پر اسے شدید تنقید اور طنز کا بھی سامنا کرنا پڑا۔کمپنی کے مطابق یہ باسکٹ بال اس کی "پاز، پلے، پرامپٹ" مہم کا حصہ ہے، جس کا مقصد صارفین کو یہ پیغام دینا ہے کہ تخلیقی سوچ صرف اسکرین تک محدود نہیں بلکہ کھیل اور روزمرہ سرگرمیوں کے دوران بھی پروان چڑھ سکتی ہے۔مصنوعے کی تفصیل میں کہا گیا ہے کہ کئی بہترین خیالات کھیلتے ہوئے ذہن میں آتے ہیں، اسی تصور کو اجاگر کرنے کے لیے یہ خصوصی باسکٹ بال متعارف کرائی گئی۔تاہم 70 ڈالر کی قیمت نے متعدد صارفین کو حیران کر دیا، کیونکہ امریکا میں اسی معیار کی سائز 7 ربڑ کی باسکٹ بال عموماً تقریباً 20 ڈالر میں دستیاب ہوتی ہے۔زیادہ قیمت اور چیٹ جی پی ٹی کی برانڈنگ کے باعث یہ باسکٹ بال سوشل میڈیا پر میمز اور طنزیہ تبصروں کا موضوع بنی رہی، جہاں کئی صارفین نے اسے غیر ضروری طور پر مہنگا قرار دیا۔ اس کے باوجود دستیاب تمام یونٹس لانچ کے ایک ہی دن میں فروخت ہو گئے۔
