گوگل ڈیپ مائنڈ کا جینی 4 متعارف، آواز کے ساتھ ورچوئل دنیائیں تخلیق کرنے والا اے آئی ماڈل

سان فرانسسکو( ویب ڈیسک)گوگل ڈیپ مائنڈ نے اپنا نیا ورلڈ ماڈل جینی 4 متعارف کرا دیا، جو مصنوعی ذہانت کی مدد سے حقیقت سے قریب تر ورچوئل دنیائیں تخلیق کرتا ہے، جہاں صارف ویڈیو گیم کی طرح گھوم پھر سکتا ہے۔اس ماڈل کی نمایاں خصوصیت یہ ہے کہ یہ تصاویر کے ساتھ آواز بھی خود تیار کرتا ہے۔ ہوا کی سرسراہٹ، موسیقی، ماحول کا شور اور کرداروں کی گفتگو دنیا تخلیق ہونے کے ساتھ ہی پیدا ہوتی ہے۔ڈیپ مائنڈ کے مطابق جینی 4 اس کا پہلا ریئل ٹائم ورلڈ ماڈل ہے جو آڈیو بھی براہ راست تخلیق کرتا ہے۔ اس میں ماحول پہلے سے تیار یا پروگرام کرنے کی ضرورت نہیں، بلکہ صارف صرف تحریر کے ذریعے اپنی مطلوبہ دنیا کی وضاحت کرتا ہے اور ماڈل صارف کی حرکت یا کیمرا گھمانے کے ساتھ ہر فریم تیار کرتا رہتا ہے۔جینی 4 کو گوگل کے جیمنائی ماڈلز کی صلاحیتوں کی بنیاد پر تیار کیا گیا ہے۔ ڈیپ مائنڈ کا کہنا ہے کہ جیمنائی اومنی ورچوئل دنیاؤں کو حقیقت سے قریب تر شکل اور رویہ دیتا ہے، جبکہ دیگر جیمنائی ماڈلز منظر میں تسلسل اور ربط برقرار رکھنے کے لیے درکار منطق فراہم کرتے ہیں۔فی الحال جینی 4 کو ریسرچ پریویو کے طور پر منتخب ٹیسٹرز کے لیے جاری کیا گیا ہے۔ کمپنی کے مطابق آنے والے دنوں میں یہ گوگل اے آئی الٹرا کے صارفین کو پروجیکٹ جینی کے ذریعے، جبکہ جیمنائی اے پی آئی اور گوگل اے آئی اسٹوڈیو کے ابتدائی شراکت داروں کو بھی دستیاب ہوگا۔ دلچسپی رکھنے والے صارفین کے لیے ویٹ لسٹ بھی کھول دی گئی ہے۔