پیوٹن کا تہران سے وعدے پورے کرنے کا اعلان، روس ایران تجارت میں 10.4 فیصد اضافہ

ماسکو ( مانیٹرنگ ڈیسک) روسی صدر ولادیمیر پیوٹن نے کہا ہے کہ روس ایران کے ساتھ مشترکہ منصوبوں کے تحت اپنی تمام ذمہ داریاں پوری کررہا ہے، جبکہ انہوں نے مشرق وسطیٰ کی صورت حال میں مثبت پیش رفت کی امید بھی ظاہر کی ہے۔غیر ملکی ذرائع ابلاغ کے مطابق پیوٹن نے ماسکو میں گیس برآمد کرنے والے ممالک کے 8ویں فورم کے موقع پر ایرانی صدر مسعود پزشکیان سے ملاقات کی، جس میں خطے کی صورت حال اور دوطرفہ تعاون پر تبادلہ خیال کیا گیا۔روسی صدر نے کہا کہ ماسکو ایران کے ساتھ مشترکہ مفادات کے حصول کے لیے کام کررہا ہے اور دونوں ممالک کے مشترکہ منصوبوں سے متعلق اپنے وعدے پورے کررہا ہے۔ انہوں نے بوشہر نیوکلیئر پاور پلانٹ کی تعمیر کا کام جاری رہنے کا بھی ذکر کیا۔پیوٹن کے مطابق رواں سال کے پہلے 8 ماہ کے دوران روس اور ایران کے درمیان دوطرفہ تجارت میں 10.4 فیصد اضافہ ریکارڈ کیا گیا۔ایرانی صدر مسعود پزشکیان نے ایران کی حمایت پر روس کا شکریہ ادا کرتے ہوئے دونوں ممالک کے درمیان سیاسی، سکیورٹی اور اقتصادی شعبوں میں تعاون اور دوطرفہ تجارت میں مسلسل اضافے کو سراہا۔