جنگ بندی کی نئی کوشش، قطر نے ایران کو مجوزہ معاہدے کا مسودہ دے دیا

دوحہ ( مانیٹرنگ ڈیسک) قطر کے ثالثوں نے امریکا اور اسرائیل کی ایران کے خلاف جنگ ختم کرنے کے لیے تہران کو نئے مجوزہ معاہدے کا مسودہ پیش کردیا ہے، جبکہ ایران اس تجویز کا جائزہ لے رہا ہے۔خبر رساں ادارے رائٹرز کے مطابق مذاکرات سے باخبر ایک عہدیدار نے بتایا کہ قطری ثالثوں نے اتوار کو ایران کے سامنے نئی تجویز رکھی اور توقع ہے کہ تہران رواں ہفتے کے اختتام تک اپنا جواب دے دے گا۔عہدیدار کے مطابق مجوزہ معاہدے کی شرائط اور اس میں شامل نکات کی تفصیلات تاحال سامنے نہیں آئیں۔رپورٹ میں بتایا گیا ہے کہ تہران میں اتوار کو ہونے والی ملاقات سے قبل خدشات موجود تھے کہ اسرائیلی وزیراعظم بن یامین نیتن یاہو اسی ہفتے ایران پر حملے دوبارہ شروع کرنے کا فیصلہ کرسکتے ہیں۔قطر کی جانب سے یہ تجویز ایسے وقت میں سامنے آئی ہے جب جنگ کے خاتمے کے لیے سفارتی کوششیں جاری ہیں۔ تاہم، ابھی واضح نہیں کہ ایران مجوزہ معاہدہ قبول کرے گا یا اس میں تبدیلیوں کا مطالبہ کرے گا۔