اسلام آباد (پاکستان خبر) پاکستان تحریک انصاف کے مشترکہ پارلیمانی پارٹی اجلاس میں اپوزیشن لیڈر محمود اچکزئی کے کردار پر سوالات اٹھائے گئے، جبکہ سینیٹ میں اپوزیشن لیڈر علامہ راجا ناصر عباس کی تعریف کی گئی۔ذرائع کے مطابق اجلاس میں پی ٹی آئی ارکان نے مؤقف اختیار کیا کہ محمود اچکزئی بانی پی ٹی آئی عمران خان کے معاملے پر اصولوں کی بات کرتے ہیں، لیکن اپنے بیٹے کے معاملے میں ان کا طرزِ عمل مختلف رہا۔ارکان کا کہنا تھا کہ چند ماہ قبل احتجاج کے دوران محمود اچکزئی کے بیٹے کو کھاریاں سے گرفتار کیا گیا تو انہوں نے رہائی کے لیے مریم نواز اور شریف برادران سے درخواست کی اور بیٹے کی رہائی تک لاہور میں موجود رہے۔ذرائع کے مطابق ارکان نے سوال اٹھایا کہ عمران خان کے معاملے میں محمود اچکزئی حکومت کو فارم 47 کی پیداوار قرار دیتے ہیں، تاہم وہ بانی پی ٹی آئی کے علاج، ملاقات اور رہائی کے لیے حکومت سے بات چیت نہیں کرتے۔ذرائع نے بتایا کہ خیبر پختونخوا سے تعلق رکھنے والے پی ٹی آئی کے ایک سینئر رکن اجلاس سے قبل ہی پریس ریلیز تیار کرکے لائے تھے۔ ارکان پارلیمنٹ نے اس پر اعتراض کرتے ہوئے کہا کہ اجلاس میں ہونے والی گفتگو ہی اعلامیے کا حصہ بنائی جائے گی۔
