لاہور( ویب ڈیسک) لاہور میں تعینات امریکی قونصل جنرل اسٹیٹسن سینڈرز نے امید ظاہر کی ہے کہ ایپل مستقبل میں پاکستان میں اپنا باقاعدہ دفتر قائم کرسکتا ہے۔اسٹیٹسن سینڈرز کے مطابق گوگل کی جانب سے پاکستان میں مقامی موجودگی قائم کیے جانے کے بعد دیگر بڑی عالمی ٹیکنالوجی کمپنیوں کی پاکستانی مارکیٹ میں دلچسپی بھی بڑھ رہی ہے۔پاکستان کی تیزی سے ترقی کرتی ڈیجیٹل مارکیٹ، ٹیکنالوجی کے بڑھتے استعمال اور آئی ٹی شعبے میں موجود مواقع نے عالمی کمپنیوں کی توجہ حاصل کی ہے۔ گوگل کی مقامی سطح پر موجودگی کو بھی پاکستان کے ٹیکنالوجی شعبے کے لیے اہم پیش رفت قرار دیا جارہا ہے۔امریکی قونصل جنرل کی جانب سے ایپل کے ممکنہ باقاعدہ دفتر کے حوالے سے امید کا اظہار ایسے وقت میں سامنے آیا ہے جب پاکستان عالمی ٹیکنالوجی کمپنیوں کے لیے ابھرتی ہوئی مارکیٹ کے طور پر اپنی حیثیت مستحکم کرنے کی کوشش کررہا ہے۔اگر ایپل پاکستان میں مستقل دفتر قائم کرتا ہے تو یہ ملک کے ٹیکنالوجی نظام، سرمایہ کاری اور ڈیجیٹل معیشت کے لیے اہم پیش رفت ثابت ہوسکتی ہے۔
