بنگلادیش کا پاسپورٹ پالیسی میں نیا فیصلہ، ’سوائے اسرائیل‘ کی عبارت دوبارہ شامل کرنے کا اعلان

بنگلادیش( مانیٹرنگ ڈیسک) بنگلادیش کی حکومت نے جنرل پاسپورٹس میں دوبارہ یہ عبارت شامل کرنے کا فیصلہ کیا ہے کہ “یہ پاسپورٹ دنیا کے تمام ممالک کے لیے کارآمد ہے، سوائے اسرائیل کے۔” یہ اقدام فلسطین کے مسئلے پر ملک کی روایتی خارجہ پالیسی اور عوامی جذبات کے مطابق قرار دیا جا رہا ہے۔بنگلادیشی میڈیا رپورٹس کے مطابق وزیر داخلہ صلاح الدین احمد نے کہا ہے کہ سفارتی پاسپورٹس میں اس ہدایت پر پہلے ہی عمل شروع ہو چکا ہے جبکہ عام پاسپورٹس میں بھی جلد اس شق کو بحال کر دیا جائے گا۔وزارت داخلہ اور محکمہ امیگریشن کے مطابق یہ فیصلہ بنگلادیش کے دیرینہ مؤقف کی عکاسی کرتا ہے، کیونکہ ملک کے اسرائیل کے ساتھ نہ ماضی میں سفارتی تعلقات رہے ہیں اور نہ ہی اس وقت موجود ہیں۔رپورٹس کے مطابق 2021 میں ای پاسپورٹ نظام کے آغاز کے دوران یہ عبارت ہٹا دی گئی تھی، جس پر مختلف حلقوں کی جانب سے تنقید سامنے آئی تھی۔حکام کے مطابق اس پالیسی تبدیلی کے ساتھ پاسپورٹ ڈیزائن اور واٹر مارک میں بھی بعض ترامیم کی جا رہی ہیں، جن میں تاریخی اور سیاسی علامات کی عکاسی کرنے والی تصاویر کی تبدیلی بھی شامل ہے۔