ممبئی( شو بز ڈیسک)بھارتیہ جنتا پارٹی کے یوتھ ونگ کے رہنما پی ایم سائی پرساد نے بالی ووڈ اداکار سلمان خان سے ان کی ممبئی میں واقع رہائش گاہ پر ملاقات کی، جہاں اداکار نے انہیں اور ان کی اہلیہ کو ڈنر پر مدعو کیا۔سائی پرساد نے انسٹاگرام اور ایکس پر سلمان خان کے ساتھ ایک ویڈیو بھی شیئر کی، جس میں ان کی اہلیہ بھی موجود ہیں۔انہوں نے سلمان خان کا شکریہ ادا کرتے ہوئے کہا کہ ان کی شاندار گفتگو اور دل چھو لینے والی مہمان نوازی سے وہ بے حد متاثر ہوئے، جبکہ اداکار کی سادگی نے بھی انہیں متاثر کیا۔سلمان خان حال ہی میں ’بگ باس‘ کے سیٹ پر اپنی فٹنس اور ٹرولز کو جواب دینے کے باعث خبروں میں رہے ہیں۔ انہوں نے اداکاراؤں کی نامناسب تصاویر اور ویڈیوز بنانے پر پاپارازی اور میڈیا کو بھی شدید تنقید کا نشانہ بنایا تھا۔سلمان خان جلد ہی اپوروا لاکھیا کی ہدایت کاری میں بننے والی فلم ’ماتربھومی‘ میں دکھائی دیں گے، جبکہ وہ ہدایت کار ومشی پیڈی پلی کی ایک فلم کی شوٹنگ میں بھی مصروف ہیں، جو آئندہ برس عید پر ریلیز ہوگی اور اس میں نین تارا مرکزی کردار ادا کر رہی ہیں۔
