کراچی ( شو بز ڈیسک)پاکستان کی قومی فضائی کمپنی پاکستان انٹرنیشنل ایئرلائنز (پی آئی اے) نے اپنے عملے کے نئے یونیفارم ڈیزائن کرنے کی ذمہ داری معروف پاکستانی فیشن ڈیزائنر حسن شہریار یاسین، المعروف ایچ ایس وائے، کو سونپ دی ہے۔پی آئی اے کے مطابق گزشتہ ماہ کراچی میں معروف فیشن ڈیزائنرز کو عملے کے نئے یونیفارم کے ڈیزائن پیش کرنے کی دعوت دی گئی تھی۔ جدت، معیار اور پاکستانی ثقافت کی عکاسی کو مدنظر رکھتے ہوئے ایچ ایس وائے کے ڈیزائن کا انتخاب کیا گیا۔ایئرلائن انتظامیہ کا کہنا ہے کہ نئے یونیفارم کی رونمائی 31 اکتوبر کو لندن سے اسلام آباد آنے والی بوئنگ 787 طیارے کی پہلی پرواز کے موقع پر کی جائے گی۔ اس پرواز میں پی آئی اے کا عملہ نئے یونیفارم پہن کر مسافروں کا استقبال کرے گا۔پی آئی اے انتظامیہ کے مطابق یونیفارم میں تبدیلی کا مقصد عملے کو جدید اور منفرد انداز دینا ہے، جبکہ اس کے ساتھ قومی شناخت اور پاکستانی ثقافتی روایات کو بھی برقرار رکھا جائے گا۔واضح رہے کہ ماضی میں عالمی شہرت یافتہ فرانسیسی فیشن ڈیزائنر پیئر کارڈن اور برطانوی ڈیزائنر سر ہارڈی ایمیز بھی پی آئی اے کے عملے کے یونیفارم تیار کر چکے ہیں۔ نئے یونیفارم کے لیے ایچ ایس وائے کا انتخاب قومی ایئرلائن کے انداز کو جدید خطوط پر استوار کرنے کی کوشش قرار دیا جا رہا ہے۔
