بجٹ 2026-27: رئیل اسٹیٹ سیکٹر میں بڑی ٹیکس کمی کی تجویز، تعمیراتی سرگرمیوں میں تیزی کی امید

 اسلام آباد( کامرس ڈیسک)وفاقی حکومت نے آئندہ مالی سال 2026-27 کے بجٹ میں رئیل اسٹیٹ کے شعبے کو متحرک کرنے اور تعمیراتی سرگرمیوں کو فروغ دینے کے لیے جائیداد کی خرید و فروخت پر عائد ٹیکسوں میں بڑی کمی کرنے کی منصوبہ بندی مکمل کر لی ہے۔ذرائع کے مطابق فائلرز کے لیے غیر منقولہ جائیداد کی خریداری پر موجودہ ٹیکس کی شرح 1.5 فیصد سے کم کر کے صرف 0.25 فیصد کرنے کی تجویز دی گئی ہے۔اسی طرح جائیداد کی فروخت پر لاگو 4.5 فیصد ٹیکس کو بھی کم کر کے 1.5 فیصد تک لانے کی سفارش سامنے آئی ہے۔حکومت اس اہم پالیسی تبدیلی کے لیے بین الاقوامی مالیاتی فنڈ (آئی ایم ایف) کے ساتھ مذاکرات کر رہی ہے، تاہم ذرائع کے مطابق عالمی ادارے کی جانب سے ان تجاویز پر تحفظات اور مخالفت کا سامنا ہے۔ذرائع کا کہنا ہے کہ آئی ایم ایف کی سخت شرائط کے باوجود حکومتی سطح پر ان تجاویز کو حتمی شکل دینے پر غور جاری ہے۔حکام کے مطابق ٹیکسوں میں کمی سے پراپرٹی مارکیٹ میں جمود ختم ہونے اور کاروباری سرگرمیوں میں تیزی آنے کی توقع ہے۔ اس اقدام سے سرمایہ کاری کے نئے مواقع پیدا ہوں گے، تعمیراتی شعبے میں روزگار بڑھے گا اور مجموعی طور پر قومی ٹیکس وصولیوں میں بہتری آئے گی۔