پرتگال( سپورٹس ڈیسک)پرتگال کے عالمی شہرت یافتہ فٹبالر کرسٹیانو رونالڈو انسٹاگرام پر ایک ویڈیو کو پسند کرنے کے باعث سوشل میڈیا پر توجہ کا مرکز بن گئے ہیں۔شائقین نے نوٹ کیا کہ رونالڈو نے ایک ایسی ویڈیو کو لائک کیا جس میں فیفا ورلڈ کپ کے دوران ارجنٹینا کے حق میں مبینہ جانبداری اور اسے فائنل تک پہنچانے میں مدد دینے کے الزامات عائد کیے گئے تھے۔ورلڈ کپ کے دوران ریفریوں کے بعض فیصلوں پر پہلے ہی سوالات اٹھائے گئے تھے، جن میں مصر کے خلاف ایک متنازع فیصلے کا معاملہ بھی شامل تھا۔ تاہم فیفا کی جانب سے ان الزامات پر تاحال کوئی باضابطہ ردعمل سامنے نہیں آیا، جبکہ سوشل میڈیا پر اس موضوع پر بحث جاری ہے۔دوسری جانب ورلڈ کپ کے فائنل میں اسپین نے اضافی وقت میں ارجنٹینا کو 1-0 سے شکست دے کر عالمی ٹائٹل اپنے نام کر لیا۔میچ کے اختتام پر ارجنٹینا اور اسپین کے کھلاڑیوں کے درمیان تلخ کلامی اور جھڑپ کا واقعہ بھی پیش آیا، جس پر فیفا نے تحقیقات شروع کر دی ہیں۔ ممکنہ طور پر اس معاملے میں ارجنٹینا کے بعض کھلاڑیوں یا فٹبال حکام کے خلاف کارروائی کی جا سکتی ہے۔واضح رہے کہ پرتگال کی ٹیم پری کوارٹر فائنل میں اسپین کے ہاتھوں شکست کے بعد ٹورنامنٹ سے باہر ہو گئی تھی۔ اس کے بعد 41 سالہ کرسٹیانو رونالڈو نے تصدیق کی تھی کہ یہ ان کا آخری ورلڈ کپ تھا۔رونالڈو نے کہا تھا کہ وہ شکست پر مایوس ضرور ہیں، تاہم پورے ٹورنامنٹ میں اپنی بھرپور کوشش کرنے پر مطمئن ہیں اور مستقبل کے حوالے سے فیصلہ مناسب وقت پر کریں گے۔
